Hop til indhold
eqqartuussivik.gl

Kalaallit Nunaanni Eqqartuussivik eqqartuussisumik qullersartaarpoq 
11-02-2019 

 

Nunatsinni Eqqartuussisunik Atorfinitsitsisartut innersuussutigaat eqqartuussisup tullia allattoqarfimmilu pisortaq Stig Nørskov-Jensen, København, Eqqartuussisutut qullersatut Kalaallit Nunaanni Eqqartuussivimmi ulloq 1. april 2019 atorfinitsinneqassasoq.

Stig Nørskov-Jensen 57-inik ukioqarpoq ukiullu 18-it kingulliit Københavnip Eqqartuussiviani sulivoq, tassani eqqartuussinermut tunngasunik suliaqarnermi saniatigut allattoqarfimmi pisortatut aqutsisunut ilaalluni. Taanna ilaatigut isumannaatsuutitsinermut illuutinillu aserfallatsaaliuinermut akisussaasuuvoq. Stig Nørskov-Jensenip CV-ia annertoqalunilu ajasoornaqaaq. Politiinngortigani mekanikeritut ilinniagaqaqqaarpoq. Politiitut sulitilluni inatsisilerituutut ilinniarpoq kingusinnerusukkullu unnerluussisutut sulilluni Domstolsstyrelsenillu sulisoqarnermut immikkoortortaqarfiani ukiualunni sulereerluni 2001-imi eqqartuussivinni sulisalerpoq.

Tamatuma saniatigut Stig Nørskov-Jensen universitetimi politiinngorniarfimmilu ukiuni arlalinni atuartitsisarpoq, taamatuttaaq Danmarkimi Eqqartuussivinni allaffinni atorfilinnik pikkorisaaqataasarluni.

Stig Nørskov-Jensen februaarip qaammataani Nuummiinnermini suliassami suunerinik oqaluttuunneqarpoq.

”Kalaallit Nunaanni Eqqartuussivimmi eqqartuussisut qullersaattut suliffigisassara pilerigeqisara ullualuit Nuummeereerlunga suli qilanaarinerulerpara. Danmarkimi eqqartuussiviit annersaanni atorfik kissaatigisimasara qimallugu atorfittaassanni suliassat pingaarutilerujussuit pissanganaqisullu unammillerpakka, Stig Nørskov-Jensen oqarpoq.

Sulisut, suliffeqarfik, suliassat aamma Kalaallit Nunaat ilinniaqqaassavakka. Eqqartuussisoqarfiit aamma Kalaallit Nunaanni Eqqartuussivik 2010-mi eqqartuussiveqarnermik aaqqissuusseqqinnermili pitsaasumik siuariartorsimapput, tamannalu soorunami uanga ingerlateqqissavara.

Kalaallit Nunaanni Eqqartussivimmi eqqartuussisoqarfinnilu piffissap sulianut atorneqartartup appartinneqarnissaa ukiuni tulliuttuni siornatigutulli pingaartillugu aallunneqassaaq. Sulianik suliaqartarneq pitsanngorsartuassavarput, naleqquttuutittuarlugu, sunniuteqarluartuutittuarlugu qaffasissumillu pitsaassuseqartuartillugu.

Ilungersuussama ilagaat suliffimmi pitsaasunik avatangiiseqarnissaq, tamannalumi ineriartortuartoqassappat, siuariartortuartoqassappat minnerunngitsumillu sulisut nalerisimaassappata pisariaqartuusoraara. Ukiamut eqqartuussisunngorniatut ilinniarnerup aallartinnissaa qilanaaraara, taamaalilluta eqqartuussisoqarfinni pikkorissunik sulisoqaannarnissaq qulakkeersinnaassavarput”.

Kalaallit Nunaanni Eqqartuussivimmi Eqqartuussisuugallartoq, Birgit Skriver, oqarpoq Stig Nørskov-Jensenip qullersaalerneratigut Kalaallit Nunaanni Eqqartuussivik piukkunnartumik, tatiginartumik inatsilerituutullu misilittagaqarluartumik aqutsisoqalersoq.

 

Qulaanut Kingullermik nutarterneqarpoq: 11-02-2019