Hop til indhold
eqqartuussivik.gl

Nunatta Eqqartuussisuuneqarfiani ikiaroornartulerineq pillugu suliami annertuumi eqqartuussuteqartoqarpoq 
08-08-2019 

 

Nunatta Eqqartuussisuuneqarfiata unnerluutigineqartut arfineq-marluk Nuummeersut hashimik Nunatsinnut 2017-imi anngiortumik aaqqissuulluakkamillu eqqussisimanermut eqqartuuppai ukiut marluk sisamallu akornanni inissiisarfimmiittussanngortillugit. Nunatta Eqqartuussisuuneqarfiata 2015-imi 2016-imilu anngiortumik eqqussisimaneq uppernarsaatissaqarsorinngilaa, taamaattumillu unnerluutigineqartut tamarmik unnerluussutinut marlunnut taakkununnga pinngitsuutinneqarput.  

Eqqartuussut Nunatta Eqqartuussisuuneqarfianit nalunaarutigineqarpoq ulloq 8. august 2019, ullut 16-it missaat suliarineqareerluni.

Nunatta Eqqartuussisuuneqarfiata tunngavilersuutaa inerniliineralu uani takuuk (pdf) (maannakkorpiaq qallunaatuinnaq atuarneqarsinnaavoq, kalaallisoortaa piaarnerpaamik saqqummersinneqarumaarpoq).

Eqqartuussutip nalunaarutigineqarnerata kingorna unnerluussisussaatitaasut noqqaassuteqarput unnerluutigineqartut ilaat sisamat eqqartuussaanermik kingorna tigummigallarneqassasut. Nunatta Eqqartuussisuuneqarfiata unnerluutigineqartunit taakkunannga pingasut iperagaatippai aalajangiillunilu unnerluutigineqartoq ataaseq, ukiuni sisamani inissiisarfimmiittussanngortinneqarluni eqqartuunneqartoq, tigummigallarneqassasoq. Unnerluutigineqartut tamarmik 2017-imi juulip naalerneranili tigusarineqaramik tigummigallagaapput.

Qulaanut Kingullermik nutarterneqarpoq: 08-08-2019