Hop til indhold
eqqartuussivik.gl

Nalunaarusiaq nutaaq: Nunatsinni Eqqartuussivinni oqalutsitut atorfillit nersualaarneqaqisut 
29-03-2019 

Ilisimatusarfiup aamma Inuit Pisinnaatitaaffiinut Institutip saqqummerseqqammerpaat Nunatsinni eqqartuussiveqarfimmi oqalutseqartarneq pillugu nalunaarusiaq. Paasissutissat 2017-imi katersorneqartut toqqammavigalugit nalunaarusiortoqarsimavoq.

Nalunaarusiami ilaatigut ima inerniliisoqarpoq: ”Eqqartuussiveqarfimmi oqalutsitut atorfillit piginnaasaasa qaffasissusaat tamaat isigalugu naammaginartuuvoq allaallu qaffasissuulluni.  Oqalutsit kalluunnaveersaarnissaannik, atorfimmi pikkorissuseqarnissaannik, oqaatsitigut pisinnaasaqarnissaannik, inatsisilerinermi isummat pillugit ilisimasaqarnissaannik ilimasunneq eqqortinneqartarpoq kiisalu qularnermik ersertitsinissaq unillatsiaqqusinissarluunniit merserisanngilaat. Taamaattoqartillugu oqaluttaaqatigiinnertut ittumik ingerlatsisoqartarpoq, eqqartuussinermi peqataasut ikioqatigiillutik oqaatigineqartunik nutserinissaq paasinninnissarluunniit oqaloqatigiissutigisarlugu. Aamma taamaattoqartarpoq eqqartuussinermi peqataasut ilaat paatsoortoqarsoralugu kukkusumilluunniit nutserisoqarsoralugu oqaluttaanermut akuliukkaangat.”

Nalunaarusiaq naapertorlugu 7 %-it isumaqarput nutserineq ajortoq (6 %) imaluunniit akuerineqarsinnaanngitsoq (1 %), kisiannili 93 % isumaqarput nutserineq naammattumik pitsaassuseqartoq, pitsaasuusoq allaalluunniit pitsaalluinnartuusoq.

Ilisimatusarfiup aamma Inuit Pisinnaatitaaffiinut Institutip inerniliissutitik sammisanut pingaarnernut pingasunut immikkoortissimavaat:

  1. Eqqartuussivinni oqaluttaanermi sinaakkutarititat

  2. Avannaamiutut tunumiutulluunniit oqaluttunut oqaluttaasoqassatillugu sumiorpaluutit assigiinnginneri, kiisalu 

  3. Oqalutsit oqaatsinik, oqaluttaariaatsimik professionaaliussutsimillu piginnaasaqarnerat

Nalunaarusiap innersuussutai pingaarnerit qupperneq 6-imi atuarneqarsinnaapput.

Nunap eqqartuussisuunera Kirsten Thomassen ima oqarpoq: Nunatsinni Eqqartuussiviit immikkut nuannaarutigaat nalunaarusiamit ersersinneqarmat oqalutsitut atorfillit pisinnaasaqarluarnermikkut  nersortariaqartut aamma professionaaliusut. Isumaqarpugut suli taamaattut. Aamma nuannaarutigalugu paasivarput eqqartuussivinni oqaluttaanermi sinaakkutarititat pitsanngornikuusut kiisalu nalunaarusiamut atatillugu paasissutissanik 2017-imi katersuisoqarnerata kingorna sumiorpaluutit eqqarsaatigalugit pitsanngoriaateqartoqarnikuusoq.

Nalunaarusiaq uani atuarneqarsinnaavoq: Kalaallit Nunaanni eqqartuussivinni nutserisarneq
 

Qulaanut Kingullermik nutarterneqarpoq: 29-03-2019